KO‘ZI OJIZLAR UCHUN 
Ekran suxadoni 
Муродилла Холиқов тадбиркорлик фаолиятини Учқудуқ шаҳрида давом эттиришга қарор қилганида адашмаганди. Бу соҳада анча тажриба тўплаган тадбиркор истеъмол бозорини яхши таҳлил қилиш билан бирга, замон билан ҳамнафас яшаш муваффақият келтиришини ҳам яхши биларди.
Ўзи ҳам дилкаш, суҳбатдошининг қалбига йўл топа оладиган қувноқ йигит. Лекин гап тўғри келса, отасини ҳам аямайдиганлардан. Ўтган йили Учқудуқ шаҳрида "Моника Муҳиддин голд" масъулияти чекланган жамиятни ташкил қилди. Таркибида мебель ишлаб чиқарадиган корхона ҳам очди. Хитой технологияси асосида ишлайдиган ускуналар келтирилди. Ҳаммаси ўз маблағлари ҳисобидан амалга оширилди. Хомашё четдан келтирилса-да, харидорларнинг дидига мос, уларнинг буюртмаларига асосан замонавий мебеллар цехда тайёрланади. Маҳсулотлар замонавийлиги, бежирим ва кўркамлиги билан ҳар қандай харидорнинг эътиборини ўзига жалб қила олади. Шу боисдан мебеллар нафақат Учқудуқ шаҳри, балки қўшни вилоятларда ҳам ўз харидорларини топган. Ҳар бир уй жиҳозининг андозаси интернетдан танлаб олинади ва шу асосда цех усталари томонидан сифатли, пишиқ ва пухта қилиб тайёрланади.
— Фақат мебель ишлаб чиқариш билан чекланиб қолмоқчи эмасмиз. Яқин келажакда фаолиятимиз турини кенгайтириш режаларимиз бор. Тўғри, ҳозир ҳам 10 турдаги турли уй жиҳозлари тайёрлаяпмиз, лекин бу кам. Биз ташқи бозорга ҳам чиқишни кўзлаб турибмиз. Бунинг учун шароитлар, имкониятлар етарли. Фақат кредит олишда бироз муаммоларга дуч келаётганимизни ҳисобга олмаганда, қолган ишларимиз олдинга силжимоқда. Яқинда "Ўзэкспомарказ" кўргазмасида қатнашиб, Хитой, Россия ва бошқа давлатлар билан 15 та ўзаро манфаатли шартнома имзоладик. Янги, замонавий технологияларни олиб келамиз. Бу билан нафақат ички бозорни тўлдириш, балки ташқи бозорга ҳам чиқиш имкониятлари яратилади. Энг муҳими, маҳаллий аҳоли учун доимий иш ўринлари очилади, — дейди жамият раҳбари Муродилла Холиқов.
Корхона жойлашган икки қаватли, замонавий услубда қурилган бино муҳташамлиги билан шаҳар марказига янада кўрк бағишлаб турибди. Бу ерда тайёрланаётган уй жиҳозлари эса энг улуғ ва энг азиз байрамимиз шукуҳи билан бирга хонадонларга файз олиб кирмоқда.
