YURT TARAQQIYOTI YO‘LIDA - BIRLASHAYLIK!

Bu dunyoda yashayotgan ezgu va pok qalbli, bag‘rikeng va sof vijdonli insonlar borki, bolalarsiz hayotning bir lahzasini ham tasavvur eta olmaydi. Zero, ularning o‘ziga xos va mos bo‘lgan shirin harakatlari, ajoyib gap-so‘zlari, quvnoq o‘yin-kulgusi barchamizni birdek zavqlantiradi, nurli kelajagi umrimizning mazmunini belgilaydi. Bugun yurtimizda yosh avlod kelajagi uchun qayg‘urish, ularga qaratilgan g‘amxo‘rlik, yaratilayotgan sharoit va berilayotgan imkoniyatlar dunyo mamlakatlarida yuksak e’tirofga sazovor bo‘layotgani ham bejizga emas.
Joriy yilda viloyat bo‘yicha 12 ta shahardan tashqari, 7 kunduzgi maktaboldi oromgohlarida jami 14 ming 362 nafar bolalarni sog‘lomlashtirish ko‘zda tutilgan. Xususan, 11 ta statsionar oromgohda 1 smenada 2 229 nafar, 7 ta kunduzgi oromgohlarda 526 nafar jami 2 755 nafar bola dam oldirildi. Shuningdek, 5 ta statsionar oromgohda 2 smenada 655 nafar bola dam oldirildi. Bugungi kunda 7 ta kunduzgi oromgohda 2 smenada 526 nafar, 6 ta statsionar oromgohda 1 772 nafar, 1 ta shahardan tashqari oromgohda 3 smenada 203 nafar jami 2 630 nafar bola dam oldirilmoqda.
O‘zbekiston kasaba uyushmalari Federatsiyasining Navoiy viloyat Kengashi tasarrufidagi Karmana tumanida joylashgan "Ishonch” bolalar sog‘lomlashtirish oromgohining uchunchi mavsumining ochilish marosimi bo‘lib o‘tdi. Erta tongdan bolalar katta tayyorgarlik bilan O‘zbekiston kasaba uyushmalari Federatsiyasining Navoiy viloyat Kengashi binosining yonida yig‘ilishgan. Ota-onalari bilan xayrlashib avtobusdan o‘rinlarini egallashdilar. Dastlabki mavsum uchun yo‘llanma olgan xodimlar farzandlari maxsus IIB avtomashinalari kuzatuvi ostida jo‘nab ketishdi.
Joriy yilgi yozgi sog‘lomlashtirish mavsumida "Ishonch” oromgohida karantin qoidalariga qat’iy rioya qilgan holda besh smenada 80 nafardan jami 480 nafar bolalarni sog‘lomlashtirish rejalashtirilgan.
Barcha oromgohlarda dam olib, sog‘lomlashtirilayotgan bolajonlarning har bir kuni mazmunli va maroqli o‘tishi uchun barcha shart-sharoitlar yaratilgan, -deydi viloyat kengashining madaniy-ma’rifiy va sport ishlari bo‘lim mudiri Norimxol Nurmonova. -Xususan, yoshlariga mos ravishda cho‘milish havzalari, sport majmualari, kutubxona, ma’naviyat va ma’rifat xonasi, madaniy dam olish uchun sahnalar mavjud. Bolajonlar uchun tasviriy san’at, kompyuter yumshoq o‘yinchok tikish, munchok to‘qish, doira, ingliz tili, shashka va shaxmat kabi to‘garaklar faoliyat yuritadi. Davlatimiz rahbari tomonidan belgilab berilgan 5 ta muhim tashabbusning maqsad va g‘oyalarini bolajonlarimizga kengroq tushuntirib berish maqsadida hamkor tashkilotlarimiz bilan birgalikda manzilli reja dasturlarini ishlab chiqdik. Biz uylaymizki, joriy yilda oromgohlarga dam olayotgan bolalarimiz mazmunan yuqori saviyada dam olishadi. -Menga shirinliklar juda yoqadi, - deydi Navoiy shahridagi 2-umumta’lim maktab o‘quvchisi Axatov Asror . -Kelajakda rassom bo‘lmoqchiman. Kitob o‘qishni juda yaxshi ko‘raman. Bu yerda badiiy kitoblar ko‘p ekan. Har bir farzandga mehr-e’tibor, g‘amxo‘rlik ko‘rsatilayotgan mana shunday yurtdan, bag‘rikeng, mehr-saxovatli xalqimiz, g‘amxo‘r Prezidentimizdan cheksiz minnatdormiz.
-Oromgohdan bolajonlarimiz bir olam taassurotlar bilan yangi do‘stlar ortirib qaytadilar, kelgusida ularning o‘z oldilariga bilimli vatanparvar bo‘lish kabi ulkan maqsadlar bilan odimlashda mustahkam pillapoya vazifasini bajaradi, - deydi Asadbekning onasi Laylo Kenjayeva. -Davlatimiz rahbari tomonidan yoshlarga ko‘rsatilayotgan e’tibor va g‘amxo‘rlikdan boshimiz osmonga yetdi. Ularga yaratilib berilayotgan shart-sharoitlarni ko‘rib ko‘zimiz quvnab dilimiz yayraydi.
Darhaqiqat, dunyoning qaysidir mintaqalarida notinchlik, qashshoqlik, ocharchilik, xavfli yuqumli kasalliklar avj olgan bir paytda, tinch va osuda yurtimizda baxtiyor va shodon ulg‘ayotgan farzandlarimizni ko‘rib, dillarda va tillarda shukrona aytamiz. Bugun bu yurt farzandlarining qadamlari dadil. Yuksak marralarni, ulug‘vor maqsadlarni ko‘zlagan navqiron avlod ular. Bir so‘z bilan aytganda, ularga g‘amxo‘rlik ko‘rsatib, havas qilib yashasak arziydi.