ЖАМИЯТ ИСЛОҲОТИДАГИ ЯНГИ ВОСИТА

"Илм, маърифат ва рақамли иқтисодиётни ривожлантириш йили"да амалга оширишга оид Давлат дастурида белгиланган ва Ўзбекистон Республикаси Президентининг шу йил мамлакат Олий Мажлисига йўллаган Мурожаатномасида Ўзбекистон Республикаси Президенти ҳузуридаги Жамоатчилик палатасини ташкил этиш тўғрисида айтиб ўтилган эди. Жорий йил 16 апрелдаги ушбу Фармон, мамлакатимизда фуқаролик жамиятини янги босқичга олиб чиқишга, унинг мавқеини яна бир поғона юқорига кўтаришга қаратилгани билан муҳим аҳамият касб этади. Янги тузилган Жамоатчилик палатаси орқали давлат, фуқаролар ҳамда нодавлат, нотижорат ташкилотлар ўртасидаги ўзаро ҳамкорликни мувофиқлаштиришнинг яна бир янги механизми вужудга келди десак, муболаға бўлмайди.
Албатта шу вақтгача ҳам бу соҳада муайян ишлар қилинаётган эди. Лекин, бу янги тузилма малакатимизда олиб борилаётган барча кенг ислоҳотларни халқчил таҳлил этувчи ва ушбу таҳлиллар асосида давлат ҳокимият органлари олдига талаб ва таклифларни етказа оладиган мустақил жамоатчилик институти бўлиб майдонга кириши мақсад қилиб қўйилган. Иккинчи тарафдан бу халқаро ташкилотларнинг ҳам мақсад ва таклифларига мувофиқ келади.
Бугунги кунда сиёсатшуносларимиз янги Жамоатчилик палатаси давлат билан халқ ўртасида "кўприк” вазифасини ўтайди, деган фикрни айтишмоқда. Бу фикрга қўшилган ҳолда айтиб ўтмоқчи эдимки, бу кўприк "очиқ кўприк” бўлиши лозим. Унда ҳеч қандай "шлагбаумлар” бўлмаслиги, икки томонни умумиллат манфаатлари учун холис боғловчи кўприк бўлиши керак. Фуқоролар давлат органларига айтолмаган фикрларини, муаммоларини, орзу-умидларини палатага, унинг аъзоларига бемалол айта билишлари керак. Шу ўринда Жамоатчилик палатаси тасарруфига ўтаётган "Менинг фикрим” веб-портали ҳам ушбу мақсадларга мос ҳолда янгиланади деб, умид қиламиз. Бугунги кунда ҳаётимизда "Жамоатчилик назорати” масаласи анча долзарблашган. Бу билан депутатлар, жамоат ташкилотлари, баъзан давлат ташкилотлари ҳам шуғулланиб, турли назорат тадбирлари, мониторинглари ўтказишади. Аммо, бу ишлар алоҳида-алоҳида бўлганлигиданми, менимча пировард натижа кутилганидек самара бермаяпти. Энди янги тузилган палата ва унинг ҳудудий бўлимлари жамоатчилик назоратини олиб боришда ана шу юқоридаги ташкилотлар ишини мувофиқлаштирувчи бўлишлиги муҳим замон талабидир.
Энди Жамоатчилик палатаси халқимизнинг ижтимоий-иқтисодий ҳаётига таълуқли қонунлар лойиҳасини ишлаб чиқилишида, уни "жамоатчилик экспертизаси”дан ўтказиш ишларида ҳам ташаббускор бўлишлари лозим, чунки бунда халқ ва давлат якдиллиги улар ҳаракатида намоён бўлади.
Умумий қилиб айтганда янги тузилган Жамоатчилик палатаси Ўзбекистонда фуқаролик жамиятини ривожлантиришда муҳим восита бўлиб эл-юрт манфаатларига хизмат қилади.
Шухрат ХАЛИЛОВ
Навоий вилоят Касаба уюшмалари ташкилотлари бирлашмаси Кенгаши раиси ўринбосари