YURT TARAQQIYOTI YO‘LIDA - BIRLASHAYLIK!

O‘zbekiston kasaba uyushmalari Federatsiyasi tasarrufidagi jismoniy tarbiya va sport-sog‘lomlashtirish ishlari boshqarmasi unitar korxonasining tashabbusi bilan O‘zbekiston Respublikasi mustaqilligining 31 yilligi oldidan kasaba uyushmalariga a’zo korxona va tashkilotlarning ishchi-xodimlari o‘rtasida "Salomatlik spartakiadasi”ni o‘tkazish rejalashtirilgan edi. Uning dastlabki bosqichlari Respublikamizning barcha tumanlarida o‘tkazildi. Unda g‘olib chiqqanlar esa, bevosita viloyat bosqichiga yo‘l oldilar. Yaqinda mazkur spartakiadaning Navoiy viloyati bosqichi Karmana tumanidagi "Ishonch” bolalar sog‘lomlashtirish oromgohida ko‘tarinki kayfiyatda o‘tkazildi. Avvalo shuni ta’kidlash lozimki, spartakiadagi tayyorgarlik jarayoni tashkilotchilardan juda katta mehnat talab etdi. Sport anjomlarini yig‘ish, hakamlar hay’atini tashkil etish, musobaqa nizomiga ko‘ra havaskor sportchilar o‘rtasida tenglikni, adolatni ta’minlash, tibbiy yordam ko‘rsatishni yo‘lga qo‘yish, tinchlikni saqlash, g‘oliblarni munosib taqdirlash ishlari osonlikcha shakllangani yo‘q. Bir gap bilan aytganda, spartakiadaning Navoiy viloyati bosqichi har tomonlama puxta tayyorgalik ko‘rilgani uchun ham yuqori saviyada o‘tdi.
Havaskorlar sportning stritbol, voleybol, stol tennisi, badminton turlari bo‘yicha juda katta kuch va imkoniyatlarini ishga solgan holda g‘oliblik uchun astoydil kurash olib bordilar. Ayniqsa, xotin-qizlar o‘rtasida o‘tkazilgan voleybol musobaqasida dastlabki bosqichda g‘olib bo‘lgan 18 ta jamoaning qatnashishi ko‘pchilikning e’tiborini tortdi. G‘ozg‘on shahridan musobaqaga tashrif buyurgan jamoaning a’zolari bitta kam, ya’ni besh nafar xotin-qizdan iborat edi. Ammo ular spartakiadaga shunchalar kuchli tayyorgarlik ko‘rgan ekanki, tarkibda bitta voleybolchi yetmasada, navbatma-navbat 3 ta tuman jamoasi ustidan munosib g‘alabaga erishdilar. Ammo chorak finalga kelganda g‘ozg‘onliklar o‘yinni Navoiy shahar jamoasiga boy berib qo‘yishdi. Bundan qat’iy nazar jamoa a’zolari barcha muxlislarning cheksiz mehr-muhabbatiga sazovor bo‘lishdi.
Stritbol musaqasida esa, Navbahor tumanidan kelgan vazni 130 kilogrammdan ortiq sportchining juda yengil harakatlari hammani hayratda qoldirdi. Hattoki, unga raqib bo‘lgan sportchilarning muxlislari ham shu polvon stritbolchining harakatlarini o‘ziga xos qiziqish bilan olqishladilar.
"Salomatlik spartakiadasi”ning stol tennisi, badminton musobaqalari ham Navoiy viloyatida professonallardan qolishmaydigan havaskor sportchilar borligini yana bir marta isbotladi.
Shuni alohida ta’kidlash lozimki, spartakiadaning Navoiy viloyati bosqichida uch yuzdan ortiq havaskorlar qatnashdi. Tushlikda barcha qatnashchilar hamda mehmonlar uchun 40 kilogramm guruchdan osh damlanib dasturxonga tortildi. Tushga qadar anch-muncha kuch sarflagan havaskor sportchilar oshdan so‘ng quvvatlarini tiklab oldilar va yana o‘zaro bellashuvlarga qizg‘in kirishib ketishdi.
Shunday qilib, kun botishi arafasida barcha g‘oliblar nomi aniq bo‘ldi. Xotin-qizlar o‘rtasida o‘tkazilgan voleybol musobaqasida Navoiy shahri jamoasiga birinchi o‘rin nasib etdi. Ikkinchi, uchinchi o‘rinlarni qiziltepalik hamda navbahorlik sportchi qizlar ilib ketishdi. Stritbol bahslarida ham birinchi o‘rin navoiylik sportchilarga nasib etdi. Ikkinchi o‘rinni hududiy elektr tarmoqlari korxonasi jamoasi qo‘lga kiritgan bo‘lsa, uchinchi o‘rinni navbahorliklar egallashdi.
Erkaklar o‘rtasida o‘tkazilgan badminton musabaqasida Navbahor tumanidan tashrif buyurgan Abbos Quchqorov birinchi o‘ringa loyiq topildi. Ikkinchi o‘rinni xatirchilik Jamoliddin Daminov egallagan bo‘lsa, navbahorlik Elyor Murodov uchinchi o‘rin bilan kifoyalandi. Xotin-qizlar o‘rtasidaga bahlarda Navoiy shahri vakilasi Moxigul Xudoyqulova hamma dugonalaridan kuchli ekanligini namoyish etib, birinchi o‘ringa ko‘tarildi. Ikkinchi o‘rin Konimex tumani sportchisi Umida Berdiyevaga tegishli bo‘ldi. Navbahorlik Ma’suda G‘offorova faxrli uchinchi o‘rinni egalladi.
Erkaklar o‘rtasida o‘tkazilgan stol tennisi bahslarida birinchi o‘rinni karmanalik, ikkinchi o‘rinni qiziltepalik, uchinchi o‘rinni navbahorlik tenischilar band etishdi. Xotin-qizlar o‘rtasida kechgan qizg‘in bahslarda esa, g‘oliblik navbahorlik, ikkinchi o‘rin xatirchilik va uchinchi o‘rin Nurotadan kelgan tennischi barildi.
Shunday qilib, "Salomatlik spartakiadasi” ning Navoiy viloyati bosqichi yakuniga yetdi. G‘oliblarga qimmatbaho sovg‘a hamda diplomlarni O‘zbekiston kasaba uyushmalari Federatsiyasi Navoiy viloyati kengashi raisi Nazira Tog‘ayeva ulashar ekan, ularning barchasiga omad tilagan holda, "Salomatlik spartakiadasi” ning Samarqandda o‘tkaziladigan Respublika bosqichida ham viloyati nomidan munosib qatnashishiga ishonch bildirdi.
Normurod Musomov, "Ishonch” muxbiri